انا طالبش ياضيقة الصدر فكيني

أنـا النـوم قدلـي ماتهنيـت بـه ليليـن


جفاني منامـي والسهـر مارحـم عينـي


علامه هجرني ليه ما امسى مـع الساليـن


ووصى علـى روحـي همـوم" تخاوينـي


عزمها على صدري وقالت مكاني زيـن!!


إلى جـف دمعـه جيـت صـدره يدفينـي


وقالت حـرام أنـي لا أزود عذابـه ليـن!


يحـس بعـذاب البعـد لا جـا المحبينـي


يا ذا الضيقه اللي وسط جوف العنا تكفيـن


أنا ما حصـل فينـي مـن الهـم يكفينـي


وإذا قلت أنا باموت ردت ... مهوب الحين؟


أنـا طالبـش ياضيقـة الصـدر فكيـنـي


أنا داري أنش عقـب فرقـاه مـا تدريـن


ويش اللي جرا في حالتـي يـوم جيتينـي


لكن مالـش إلا طيبـة الخاطـر بترضيـن


ببين لش اللي مـن فراقـه حصـل فينـي


عقبها على كيفـش تروحيـن ولا اتجيـن


وإذا مـا اقتنعتـي جيـت للحـق بيدينـي


يسير علي طيفه من الحيـن ليـن الحيـن


وإلى زارني صـارت دموعـي عناوينـي


وتضمى على شوفه عيوني مع انـه بيـن


هدبهـا وإلـى غمضـت طيفـه يشالينـي


تصدق لو أن الدمع لـه حـس ولا ايديـن


طلبني وقـال إلـى متـى وأنـت تبكينـي


أنا في رجى وصلـه لعـل وعسـاه يليـن


أنا لي متى والبعد فـي الجـوف يكوينـي


ومن قال غيره قلت جعـل النـذر نذريـن


ويفـداه مـن فكـر بزيـنـه بيغريـنـي


وعقب ذا الكلام اللي سمعتيه وش تبغيـن


أنـا طالبـش ياضيقـة الصـدر فكيـنـي





وسلامتكم

منقول للامانه